വേണ്ടത് ദുഹാ

ഒമാനിലെ മത്ര പ്രദേശം ഇന്ന് കൊറോണ വൈറസ് മൂലം അടച്ചിട്ടിരിക്കുകയാണ്. സമ്പൂർണ്ണ ഷട്ട് ഡൗൺ. മത്ര സൂഖിനെ സംബന്ധിച്ചിടത്തോളം അവിടുത്തെ കച്ചവടക്കാരും തൊഴിലാളികളും നിരാശയിൽ ആയിരിക്കും. പൊതുവേ കച്ചവട മാന്ദ്യം അനുഭവിക്കുന്ന രാജ്യത്ത് റമദാൻ വരുന്നതോടുകൂടി കച്ചവടം മെച്ചപ്പെടുന്ന ഒരു അവസ്ഥ ഉണ്ടാകാറുണ്ട്. സ്വദേശികളും വിദേശികളും സാധനം വാങ്ങാൻ വേണ്ടി മത്ര സൂഖിൽ കറങ്ങുന്ന കാഴ്ച ഒഴിവുദിനങ്ങളിലും റമദാനിലും കാണാനൊക്കും. ഇന്ന് ആകെ തകിടം മറിഞ്ഞിരിക്കുകയാണ്. എല്ലാ പ്രതീക്ഷയും അസ്ഥാനത്ത് ആകുന്ന ദുരിതാന്തരീക്ഷം. നാട്ടിൽ നിന്നും മറ്റും പിരിവിന് വരുന്നവർക്ക് ജാതിമതഭേദമന്യേ, സംഘടനാ പക്ഷപാതിത്വം ഇല്ലാതെ വാരിക്കോരി നൽകാൻ മുതലാളിമാരും തൊഴിലാളികളും മുൻപന്തിയിലാണ്. ഒരുപാട് നന്മയുടെ കാരുണ്യ കഥകൾ മത്ര സുഖിന് പറയാനുണ്ട്. കാരുണ്യ തീരം എന്നുതന്നെ വിശേഷിപ്പിക്കാം മത്രയെ. ഇന്ന് അവർക്ക് വേണ്ടത് സഹായങ്ങൾ ഏറ്റുവാങ്ങിയവരുടെയും നന്മയിൽ താല്പര്യമുള്ളവരുടേയും വിലപ്പെട്ട പ്രാർത്ഥനകളാണ്. വന്നുപെട്ട ഈ മഹാമാരിയിൽ നിന്നും ഈ രാജ്യത്തെയും ജനങ്ങളെയും അല്ലാഹു കാത്തു രക്ഷിക്കട്ടെ (ആമീൻ)