ലൗ ജിഹാദ്‌

മുറ്റത്തേക്ക്‌ മുറുക്കി തുപ്പി
കോലായില്‍ കുന്തിച്ചിരുന്ന
അറുപതുവയസിന്‍റെ പിറുപിറുപ്പിനെത്തേടി
നടവഴിയെ വടിയിടിച്ചുവന്ന
താടി നരച്ച ആ നോട്ടം
പ്രണയത്തിന്‍റെ കാല്‍ക്കുലേറ്ററില്‍
കൂട്ടിയും കുറച്ചും
അവര്‍ ഒരു പച്ചവരയിട്ടു വെട്ടികളയുന്നു.

[നിസ്കാര തഴമ്പുള്ള നെറ്റികള്‍
മുല്ലപൂചൂടിയ മുടിയിഴകള്‍ കണ്ടു മോഹിക്കരുത്.
കുരിശു തൂക്കിയ കഴുത്തുകള്‍
പര്‍ദയ്ക്കുള്ളിലെ രഹസ്യങ്ങള്‍ അന്വേഷിക്കരുത്‌.
കാരണം, ഇത് ലൌ ജിഹാദിന്‍റെ കാലമാണ്,
പ്രണയത്തിന്‍റെ എതിരാളികള്‍ക്ക് വയറിളക്കം പിടിച്ച കാലം.]


ലൌ ജിഹാദിന് എന്‍റെ നിര്‍വചനം - പ്രണയത്തെ മതത്തിന്‍റെ പേരില്‍ എഴുതി തള്ളാന്‍ ശ്രമിക്കുന്ന സംഘടിതമായ ഏത് ശ്രമവും, പ്രണയിക്കുന്നവരെ അവരുടെ വഴിക്ക് വിടാന്‍ തയാറാവാത്ത ഏതു സമൂഹവും ലൌ ജിഹാദികളുടെ കൂട്ടായ്മയാണ്. ജിഹാദിന്‍റെ ഇരുപത്തി ഒന്നാം നൂറ്റാണ്ടിലെ അര്‍ഥം കണക്കില്‍ എടുത്ത്, ലൌ ജിഹാദ് എന്നാല്‍ മതത്തിന് വേണ്ടി പ്രണയത്തെ കൊല്ലുക എന്ന് അര്‍ഥം.